STA. MARIA, Davao Occidental — Human sa pag viral sa video sa usa ka babaye nga nagwalis sa iyang sinina samtang nagsayaw-sayaw ibabaw sa entablado sa usa ka event sa nasampit nga dapit, gipanawagan karon ni Sta. Maria Mayor Claude Benjamin II "Dinko" Bautista nga i-pang-delete sa mga uploader ang ilang na-upload sa social media sa nahisgutang video.
Sumala ni Dinko nga dali ra kaayo pangitaon sa social media ang mga mi-upload sa video sanglit high tech karon ang mga kahimanan sa susama niini nga insidente pinaagi sa cybercrime unit sa kapulisan.
“Sa mga nag-share sa video, mamalihog ko nga ipang-delete ninyo ang inyuhang shared nga posts, dali ra kay mo pangitaon sa Facebook ug magkinaunsa man,” tipik sa Facebook post ni Dinko kagahapon sa buntag, Oktubre 16, 2024.
Una niini, daw law-ay kaayong tan-awon ang maong babaye sa video nga na-delete na usab sa uploader, diin giwalis sa babaye ang iyang suot ug nakita ang pribadong parte sa lawas samtang nagsayaw-sayaw nga gialirungan sa pipila pa ka mga tawo nga nagsadya sa event.
Dugang pa ni Dinko nga iyang pa-imbestigahan ang hitabo ug patubagon ang nalambigit nga organizer diin ang nasampit nga babaye usa ka menor de edad.
"Paningkamutan nako, kauban sa MSWD, PNP ug DILG nga manubag ang angayan manubag. From officials to organizers, isa-isahon ta mo,” sumpay sa pamahayag ni Dinko.
Nasayran nga daghan og pasundayag ang lungsod nunot sa kasaulogan sa Araw ng Barangay Poblacion, Oktubre 15, 2024.
Hinuon, ang hitabo wala nakatandog sa maayong imahe ug paspas nga kalamboan sa lungsod sa pagdala ni Dinko, kauban si Vice Mayor Josephine Mariscal, ug sa Sangguniang Bayan members. (Jeepy P. Compio)