GITUMBOK nga "critically endangered" ang babaye nga Philippine freshwater crocodile nga nasignit sa mga mananagat sa sapa alas 2:00 sa hapon, Sabado, Hunyo 7, 2025, sa Barangay Sarayan, President Roxas, Cotabato Province.
Ang buaya nga mosukod og kapin unom ka tiil ang gitas-on ug motimbang og 60 kilogramos.
Matud ni University of Southern Mindanao (USM) veterinarian student ug Green USM volunteer Erben Pitogo nga nadakpan sa mga mananagat ang buaya ug gipapos og pisi ang lawas niini.
Gibutyag ni Pitogo nga plano unta sa mga molupyo sa maong dapit nga imatada ang ang buaya apan wala nila idayon.
Pagkahibawo sa mga opisyales sa barangay, nangayo dayon sila og tabang sa Department of Enviroment and Natural Resources (DENR 12) – Provincial Environment and Natural Resources Office (PENRO-Cotabato) aron maluwas ang buaya.
Gipaubos sa veterinary assessment ang buaya nga gipangunahan ni Dr. Jessa Del Remonde ug nasuta nga himsog kini.
Gipaubos dayon ang buaya og pag-atiman sa USM-Wildlife Rescue Center ug human ma-obserbahan nga kahimsog niini, gibuhian na kini sa Liguasan Marsh sa Kabacan area sa maong probinsiya.
Ang Philippine freshwater crocodile maoy usa sa pinakatalagsaon nga espisye sa buaya sa tibuok kalibutan ug endemic sa Pilipinas o dinhi lang makit-an.
Gitala kini nga "critically endangered" sa IUCN Red List. (Edgar E. Fuerzas)