HIMAS-HIMAS sa rehas sa prisuhan ang usa ka babayeng pulis ug 17-anyos nga didong niini human sila maaktuhi sa bana sa ilang mga milagro, alas 11 a.m., Dominggo, Marso 24, 2024, sa probinsiya sa Cotabato.
Saysay sa bana nga si alyas Alvin, usa ka Police Staff Sergeant (PSSG), nga dugay na siyang nagduda nga may lain ang asawa niyang pulis nga si alyas Lyn nga usa sab ka Police Staff Sergeant (PSSG) kay magsige kini og lakaw bisan og on-duty.
Tungod sa iyang mga pagduda, usa ka adlaw dihang milakaw ang asawa gisundan kini sa bana.
Misiga ang mata sa banang pulis human makita ang asawang miliko padung sa usa ka lodging house sa Barangay Poblacion sa lungsod sa Kabacan uban ang usa ka batan-ong lalake.
Abtik nga nakaadto sa police station si alyas Alvin, nagpatabang sa iyang ka-baro ug girumbo ang lawak nga gisudlan sa duha.
Naglungot-lungot ang bana sa pagluib nga gihimo kaniya, apan gipugngan siya sa mga kaubanan nga mapasakitan ang duha.
Sa kasamtangan anaa sa prisuhan ang babayeng pulis ug langga-langga niini, samtang gihikay ang kasong ipasaka sa bana nga pursigidong patilawon og tagam ang duha. (EEF)