GIPAHIBALO sa Department of Health-Davao Region (DOH-Davao) nga magmugna sila og "fact-finding team" aron imbestigahan ang giingong insidente nga giilisan o gikambyohan ang masuso sa Davao Oriental.
Gikanayon ni Undersecretary Abdullah Dumama Jr., DOH Area for Mindanao Concurrent head, nga ang "fact-finding team" mugnaon aron mohimo og "due process" and ensure objectivity" sa pagyagyag sa kamatuoran bahin sa "baby-switching" nga insidente.
“Wala po tayong kakampihan dito hindi po tayo magiging bias, objective lang tayo and we will closely coordinate with the hospital tapos thorough investigation para mailman natin ang totoo,” matud niya sa paghinabi sa tigbalita niadtong Enero 24, 2025.
Kahinumdoman nga sa programa nga Kapuso Mo, Jessica Soho, duha ka mga inahan gikan sa Davao Oriental nagpaabot kaniya, ug nag-angkon nga ang ilang mga anak nga babaye posibleng gikambyo sa ospital human gipanganak. Human sa serye sa DNA tests, nakompirma nga ang insidente sa pagkambyo sa mga bata nahitabo gayud.
Gipadayag ni Dumama nga kung ang pagpabaya masayran sa bahin sa Davao Oriental Provincial Medical Center, masayran kini pinaagi sa imbestigasyon. Apan iyang gitin-aw nga ang ospital naningkamot sa ilang bahin aron nga ikoreher ang maong hitabo.
Dugang niyang gikanayon nga kung pagpabaya mapamatud-an, dunay tugbang nga mga silot. Apan iyang giklaro nga "uncertain" pa kung ang DOH o ang provincial government magsilot niadtong responsable sa pagkambyo.
Gipahimug-tan sa DOH-Davao nga ang ilang prayoridad mao ang pagseguro nga ang maong insidente di na masubli pa. Isip "preventive measure", mag-implementar sila sa One DOH Approach, nga nagtumong sa pagpromotar sa "accreditation of health facilities as mother-baby friendly" nga mga ospital.
Matud ni Dumama nga daghang mga ospital sa rehiyon di pa "accredited" sa DOH ug nagpahimug-at nga kining maong mga ospital kinahanglan gyud i-accredit aron nga maseguro nga nisunod sa saktong protocols nga gitakda sa departamento.
Dugang pa niya nga buot nilang -"integrate the mother-baby friendly hospital accreditation" ngadto sa "hospital licensing process". Pagklaro niya nga ang ospital di hatagan og lisensiya hangtud naa sila niining programa. (RGP)