Bag-ong DCPO director molingkod na

KAMPANTE ang tibuok han-ay sa kapulisan sa Davao City Police Office (DCPO) nga mas mapakusgan pa ang operasyon batok kriminalidad sa tibuok siyudad sa Davao City sanglit kini ang numero uno nga gidala sa bag-ong molingkod nga hepe sa DCPO karong adlawa, Lunes, Hulyo 8, 2024.

Sa usa ka naunang pahibalo sa DCPO ngadto sa mga tigbalita, molingkod karong adlawa ang bag-ong director nga si Police Colonel Lito Patay, hulip kang Police Colonel Rolindo Suguilon nga milingkod isip officer-in-charge sa DCPO niadtong Mayo 23, 2024.

Si Patay mi-graduate sa Philippine National Police Academy (PNPA) Class of 1996 kinsa maoy operations officer sa Police Regional Office (PRO) Davao Region ug kanhi Provincial Director sa Davao del Norte Police Provincial Office (DDNPPO).

Nahimong Station Commander sa Quezon City Police District (QCPD) dayon nahimong director sa Criminal Investigation and Detection Group (CIDG) sa Central Visayas sa administrasyong Duterte.

Sa tuig 2019, nabutang siya isip director sa CIDG Luzon diin usa sa dakong kalampusan mao ang operasyon batok sa online gambling sa Mactan ug sa Lapu-Lapu City sa Cebu niadtong Septyembre 2019.

Sa maong operasyon, nadakpan ang 181 ka mga Chinese nationals nga nagpadagan og ilegal nga online gambling.

Sumala ni DCPO spokesperson Police Captain Hazel Tuazon nga mas mapakusgan pa ang kampanya batok kriminalidad sa dakbayan subay sa gipakusgan na nga programa sa naunang mga city director.

Usa ka hamubo nga seremonya ang gihimo kagahapon sa opisyal nga paglingkod ni Patay isip bag-ong director sa DCPO. (Jeepy P. Compio)