SA DI madugay, ang mga molupyo sa Davao Oriental makabenepisyo na sa expanded healthcare services human ang pagsubo sa bag-ong pasilidad sa Davao Oriental Provincial Medical Center (DOPMC) sa Mati City niadtong Hulyo 17, 2025.
Ang pagtukod og Ambulatory Care Clinic, ang Patients’ Halfway House, ug Multi-purpose Building opisyal nang gisugdan sa usa ka seremonya nga gipangulohan sa nag-unang mga opisyales sa probinsiya ug mga kaabag sa health sector. Ang bag-ong estraktura gidesinyo nga motubag sa panginahanglan sa mga pasyente kinsa nagkinahanglan og medical attention apan di makatubag sa kriteriya alang sa hospital admission, ilabi na kadtong gikan sa hilit nga mga lugar kinsa kasagaran way luwas nga kapuy-an samtang maghuwat sa ilang pagpanambal.
Ang proyekto mao ang resulta sa kolaborasyon nga paningkamot sa Department of Health, Provincial Government sa Davao Oriental, ug sa buhatan sa 2nd District Representative Cheeno Miguel Z. Almario, kinsa nag-alokar og P6 milyon aron pagtabang sa pagpunod sa kalamboan.
Si Governor Nelson Dayanghirang, kinsa nitambong sa pagsubo, nagsulti nga ang inisyatibo mao ang lakang padulong sa paghimo sa healthcare nga mas mapuslan ug patient-centered, ilabi na kadtong "geographically isolated and disadvantaged" nga mga komunidad.
Naa sab sa maong seremonya mao sila Mati City Mayor Joel Mayo Z. Almario, Vice Governor Glenda Rabat Gayta, Board Member Lady Hope Macayra, Councilor Jr Pang, ug gma representante gikan sa Department of Health Region-Davao Region (DOH-Davao).
Ang tukuron nga Halfway House gilauman nga mohatag og temporaryo nga kapuy-an sa mga pasyente ug sa ilang mga kauban, aron nga makubsan ang kabug-at sa pinansiyal sa pagpangita og akomodasyon sa siyudad. Ang Ambulatory Care Clinic modawat sa mga pasyente nga nanginahanglan og padayon nga outpatient services, samtang ang Multi-purpose Building maoy mosuporta sa "administrative, training, and public health outreach" nga mga kalihukan.
Ang kalapad sa Davao Oriental ug ang "rural terrain" aron nga makakuha og healthcare maoy padayon nga hagit alang sa kadaghanan sa mga molupyo, ilabi na gyud kadtong nanimuyo sa mga hilig nga munisipalidad. Matud sa mga opisyal sa panglawas nga ang proyekto maoy motubag sa dugay nang kahaw-ang sa medical infrastructure sa probinsiya, nga nagtumong sa pagtulay sa kalayo tali sa "underserved communities and essential care". (David Ezra Francisquete)