DAVAO DE ORO - Human sa nasinating baha, bagang duot na sab sa lapok ang gikaproblemahan sa mga molupyo sa Purok 10, Brgy. Poblacion, Compostela.
Kini ang gibutyag sa usa ka alyas Tano kinsa nahinabi ning tigsuwat sa mismong pinuy-anan niini alas 10:30 sa buntag, Huwebes, Pebrero 1 , 2024, samtang padayong namanwas sa daw taga-tuhod nga lapok ngadto sa nataran sa ilang balay.
Matud pa nga normal na lang sa mga molupyo sa dapit nga human sa baha ang bagang duot na sab sa lapok ang gikinahanglang kaluson ug silhigon aron mabalik sa normal ang tanan.
Sumala pa nga ang maong bagang duot sa lapok, dala sa tubig baha nga miapaw gikan sa dakong sapa nga anaa sa maong purok.
Samtang si Isagani Trocio, Sr., nga molupyo sab sa maong dapit, naabtan ning tigsuwat nga namoblema sa dugay nga paghubas sa tubig baha nga anaa sa nataran sa iyang balay nga kung lapok na lang ang gikaproblema sa iyang mga kasilinganan, sa nataran sa balay ni Trocio, Sr., anaa pa ang taga-tuhod nga tubig baha nga kuno molungtad pa kini og kapin usa ka semana una mohubas gumikan sa baradong kanal haduol sa iyang balay.
Nga ang maong baradong kanal iya nang gireklamo sa barangay ug nanghinaut kini nga sa hinanaling panahon maaksiyonan ang maong problema.
"Mao naman gyud na diri mobaha dayong kung ting-ulan, pero kung maaksiyonan na nang baradong kanal di na sama kadugay karon ang paghubas sa tubig baha. Masabay na ni sa akong mga kasilinganan ang paghubas sa tubig,“ sulti ni Trocio, Sr.