DUNAY posibilidad nga ang low pressure area (LPA) nga nasiplatan sa Davao City, sidlakan sa Mindanao, madebelop sa tropical cyclone sulod sa 24 hangtud 48 oras ug pagatawgon kini nga Butchoy, ang ikaduhang bagyo karong tuiga.
Gikanayon sa Philippine Atmospheric, Geophysical and Astronomical Services Administration (Pagasa) nga ang daut sa panahon gibanabana nga 310 kilometros sa Sidlakan Amihanang-Silangan sa Davao City alas 3:00 sa kaadlawon, Hulyo 16, 2024.
Ang sunod nga pagbanabana mahitabo alas 4:00 sa kaadlawon sa Myerkules, Hulyo 17.
Nalantawan sab kini nga milihok padulong sa central o amihanan sa Pilipinas, base sa tropical cyclone threat potential forecast sa Pagasa.
Kasamtangan, ang hanging habagat makaapekto ug magdala og katag-katag nga pag-ulan sa kasadpang seksiyon sa Southern Luzon, Visayas, ug Mindanao. Posibleng dunay mahitabong mga pagdahili ilabi na sa mga ubos nga bahing mga lugar tungod sa kasarangan hangtud sa kusog nga mga pag-ulan nga molungtad og pipila ka oras.
Samtang ang Metro Manila, Zamboanga Peninsula, Barmm, Soccsksargen, Cavite, Batangas, Bataan ug Occidental Mindoro makasinati og mapanganuron nga bahin sa kalangitan uban sa katag nga mga pagpanaligsik tungod sa hanging habagat.
Niadtong Lunes, Hulyo 15, gipahibawo sa National Disaster Risk Reduction and Management Council nga base sa ilang "situation report," ang kasamtangan nga paghuyop sa habagat nakaapekto na og 60,841 pamilya sa 11 ka probinsiya sa lima ka rehiyon.
Danyos sa mga balay, inprastraktura, agrikultura ug uban pang mga kabtangan nikantidad na og dul-an P21 milyones.
Kahinumdoman, gisulti sa Pagasa nga duha hangtud tulo ka bagyo mahimong maporma o mosulod sa Philippine area of responsibility karong bulana. (David Ezra Francisquete)