GIKANAYON ni Konsehal Diosdado Angelo Mahipus Jr. sa Davao City nga kinahanglan nga molusad og komprehensibong pagsusi sa mga ordinansa sa "traffic enforcement, local design standards, and intersection controls" human gitaho sa Traffic Enforcement Unit’s (TEU) ang pagtaas sa ihap sa aksidente sa kadalanan sa dakbayan.
Si Mahipus, kinsa maoy assistant floor leader, nag-awhag sa Konseho ning siyudad nga suportahan ang pagsusi sa mga polisiya sa traffic enforcement sa dakbayan aron nga matumbok ang "hotspot zones."
Iyang gipahimug-atan ang kamahinungdanon sa pagpangita og technical input gikan sa City Transport and Traffic Management Office (CTTMO), TEU, Department of Public Works and Highways (DPWH), ug sa mga planning and traffic engineers sa dakbayan.
“Let us also give space for the public and key stakeholders to contribute to the formulation of responsive and data-driven solutions. If this calls for a committee hearing or multi-sectoral forum, then we must set that in
motion,” pagpasabot niya atol sa iyang privilege speech, Martes, Agosto 5, 2025, sa Sanguniang Panlungsod.
Matud ni Mahipus nga utang nila ngadto sa mga pamilya kinsa namatyan og minahal sa kinabuhi sa mga aksidente sa dalan ug kadtong nigamit sa kadalanan sa siyudad matag adlaw. Iyang gidasig ang Konseho nga molihok “with urgency, with clarity, and with resolve.”
Iyang gitin-aw nga ang pagtaas sa ihap sa mga aksidente sa kadalanan di lang tagdon nga isip naandan lang, kay ang datus nagtudlo ngadto sa mga hinungdan sa publiko nga nasayud na: "distracted driving, use of mobile phones, fatigue, and disregard for basic traffic rules."
Iya sab nga gitin-aw nga ang highest road crash concentrations naa sa C.P. Garcia, McArthur Highway, Cabantian, Panacan, ug Ma-a.
Sa iyang pagpamulong, iyang hiniusang giduso ngadto sa Committee on Public Works and Highways ug sa Committee on Transportation and Communication alang sa pagtuon ug rekomendasyon.
Kahinumdoman, gitaho sa TEU ang 31.3 porsiyento nga pagtaas sa aksidente sa kadalanan atol sa unang pito ka bulan sa 2025 itandi sa samang panahon sa niaging tuig.
Gitaho ni TEU chief Lieutenant Colonel Christian Antonio D. Garcia nga niadtong Hulyo 30, 2025, nga dunay kinatibuk-ang 2,598 ka mga aksidente sa kadalanan ang natala gikan Enero hangtud Hulyo karong tuiga, taas gikan sa 1,998 ka mga kaso sa samang panahon niadtong 2024.
Aron matubag ang nagkataas nga mga aksidente, gisulti ni Garcia nga ang TEU naningkamot uban sa Land Transportation Office (LTO) nga mobansay og dugang mga personahe sa tukma nga traffic enforcement ug mga balaod nga dunay kalambigitan niini.
Ang buhatan nag-awhag sab sa tanang mga motorista nga obserbahan ang lagda sa trapiko, magmaneho nga responsable, ug pabilin nga alerto samtang magmaneho aron makatabang nga makubsan ang mga aksidente sa kadalanan sa dakbayan. (Rojean Grace G. Patumbon)