GIPAHIBALO sa Davao Light and Power Company (Davao Light) ang pagkubos sa ilang bayad sa residential electricity sa Hunyo hangtud Hulyo 2025 billing period, nga mihatag og gikinahanglan nga alibyo sa pinansiyal sa mga konsumante.
Epektibo alang sa billing period nga Hunyo 11 hangtud Hulyo 10, ang bayad nitiurok sa P0.4168 matag kilowatt-hour (kWh), nga nihatud ngadto sa bag-ong bayad nga P8.6885/kWh, ubos gikan sa P9.1053/kWh niadtong Mayo.
Gitampo sa power distributor ang pagkubos ngadto sa ubos sab nga galastohan sa power supply gikan sa Wholesale Electricity Spot Market (WESM), kon diin ang porsiyon sa elektrisidad maoy gikuhaan sa Davao Light.
Ang bayad sa WESM matarog matag bulan agad sa panginahanglan ug kondisyon sa suplay sa tibuok grid, ug ang ubos nga presyo sa merkado karong bulana nagtugot sa Davao Light nga ipasa ngdato sa "savings" alang sa mga konsumante.
“The rate decrease is due to the lower power supply prices from the Wholesale Electricity Spot Market, where Davao Light sources part of its power requirement. Even with this lower rate, the power distribution utility encourages customers to practice energy efficiency to keep electricity bills manageable,” subay sa gisulti sa Davao Light sa Facebook post niadtong Hunyo 13, 2025.
Kini nga nagpadayon nga "downward adjustment" nga "trend of fluctuating power rates" nakita na sa niaging mga bulan. Niadtong Mayo 2025, giimplementar sa Davao Light ang pagtiurok ngadto sa P9.1053/kWh gikan P9.5514/kWh sa Abril.
Sayo niini, Pebrero 2025, ang kompaniya nag-implementar sab og pag-ubos ngadto sa P8.4027/kWh, tungod sa pag-ubos sa generation charges ug "one-time refund" gimando sa Energy Regulatory Commission (ERC).
Bisan sa pag-ubos sa bayad, nagtambag ang Davao Light sa ilang mga konsumante nga maghunahuna sa ilang paggamit sa elektrisidad. Ilang gipahimug-atan nga ang ubos nga bayad di dayon awtomatik moresulta sa ubos nga bills, ilabi na kung ang electricity consumption nitaas, partikularmente sa panahon sa ting-init kon diin ang paggamit sa pagpabugnaw nga mga aplayanses sama sa electric fans ug air conditioners nagtaas.
Giawhag sa Davao Light ang ilang mga konsumante nga magkonserba og enerhiya pinaagi sa pagtangtang sa mga saksak sa wala gamita nga aplyanses, gamit og energy-efficient nga himan, ug paggamit og natural lang nga bentilasyon. Kini nga mga praktis makatabang sa mga kustomer nga makadumal sa ilang electricity bills samtang magmentinar ang paghupay, ilabi na atol sa grabe kataas nga temperatura. (Rojean Grace G. Patumbon)