ANG Davao Oriental na lang ang nag-inusarang probinsiya sa Davao Region nga dunay nagpabiling guerilla front, sumala sa 10th Infantry Division (10ID) sa Armed Forces of the Philippines niadtong Biyernes, Hulyo 15, 2022.
Apan gisulti ni 10ID Spokesperson Capt. Mark Anthony Tito nga ang nahabiling grupo sa rebelde mao ang mihinay nang Guerilla Front 18 nga mao sab ang katapusang guerilla front sa Davao Region.
Kung mapuhag na kini nga grupo, matud ni Tito, ang Davao Oriental makonsidera na nga "insurgency-free", lakip sa uban pang mga probinsiya sa rehiyon.
"Mao ni atong gipaningkamutan karon na ma-dismantle kining nahibilin nga nag-inusara na lang nga guerilla front sa tibuok Davao Region," tug-an ni Tito sa paghinabi sa radyo.
Ang ubang bahin sa rehiyon hinay-hinay nga gideklarang "insurgency-free" karong tuiga sugod sa Davao City niadtong Marso, gisundan sa Davao del Norte niadtong Hunyo, samtang ang Davao Occidental, Davao de Oro, ug Davao del Sur gikonsidera na sab nga "insurgency-free" apan wala pa pormal nga gipahibawo.
Ang pagpuhag sa guerilla fronts (GFs) sa nasud gipatuman pinaagi sa Executive Order No. 70 sa kanhi administrasyon ni Presidente Rodrigo Duterte nga nagmugna sa National Task Force to End Local Communist Armed Conflict (NTC-Elcac).
Sukad sa pagpatuman sa NTC-Elcaac program niadtong 2018, ang 10ID nakahimo na og puhag sa 15 ka guerilla fronts sa Davao Region. (ICM)