DON MARCELINO, Davao Occidental -- Mokabat na sa 1,000 baboy ang nangamatay human nakasud ang pinakaunang kaso sa African Swine Fever (ASF) sa maong lungsod.
Daling gipalihok sa Office of Civil Defense (OCD)-Davao ang Regional Animal Disease Task Force human natala ang ASF sa lugar.
Matud sa Department of Agriculture (DA)-Davao, kini maoy pinakaunang kaso sa tibuok Mindanao.
Gimanduan dayon ni Don Marcelino Mayor Michael Maruya ang 24/7 temporary lockdown sa pagbaligya ug pagpamalit og mga baboy gikan sa walo ka mga barangay sama sa Linadasan, North Lamidan, South Lamidan, Calian, Mabuhay, Lawa, Nueva Villa ug Baluntaya.
Ang temporaryong lockdown maoy rekomendasyon sa DA-Davao ug sa Provincial Veterinarian Office aron mapugngan ang pagkatag sa ASF ug masegurong luwas ang mga konsumidor sa ilang pagkaon og karneng baboy.
Gimanduan sa DA ang kapulisan sa probinsiya, mga barangay kapitan ug uban pang opisyal nga segurohong ma-establisar ang 24/7 animal quarantine checkpoints sa tanang entry points sa munisipalidad.
Gialerto na sab sa mga lokal nga opisyal ang ilang mga residente aron mohatag sa ilang kooperasyon sa maong sitwasiyon.