HUSTISYA ang singgit sa pamilya sa 11-anyos nga lalaki human nga napatay sa operasyon sa kapulisan sa Parang, Maguindanao del Norte Province.
Giila ang biktima nga si Abel Kusain ug nagpuyo sa Barangay Gadungan, Parang.
Matud sa ginikanan sa bata nga si Teko ug Papaw Kusain nga natulog lang ang bata sa ilang payag sa uma sa dihang nahitabao ang ronda sa mga pulis sa maong dapit kon diin ang target abtik nga nakaikyas.
Nasum-ok, sumala pa, ang mga pulis sa payag sa biktima ug didto na nahitabo ang pagpamusil sa bata nga niadtong higayona natulog hinungdan sa iyang kamatayon.
Gitumbok sa pamilya ang grupo sa mga pulis apan dili pa mapanganlan hangtud matud pa nga dili pa nila mapasaka ang tukmang reklamo batok kanila.
Gitataw ni Papaw nga didto natulog ang bata sa ilang payag sa uma human sa iyang pagpamunot og lubi.
Tungod niini, nanawagan ang magtiayon sa Chief Minister sa Bangsamoro Autonomous Region in Muslim Mindanao, Ahod Balawag Ebrahim, Maguindanao Del Norte Officer-in-Charge Governor Abdulraof Macacua ug sa pamunoan sa Police Regional Office-BAR nga unta matabangan sila nga makab-ot ang hustisya. sa kamatayon sa ilang anak.