GIBUTYAG sa Bureau of Fire Protection-Davao (BFP-Davao) niadtong Biyernes, Enero 12, 2024, nga ang ilang ahensiya nitubag og mga 600 ka insidente sa sunog niadtong 2023, mas taas itandi sa 500 insidente nga natali niadtong 2022.
Kini maoy gipahibawo ni BFP Davao City spokesperson Senior Fire Inspector (SF04) Ramil Gillado sa paghinabi kaniya sa radyo.
Gitumbok ni Gillado nga ang dakong mga hinungdan sa mga insidente sa sunog mao ang electrical short circuits nga niresulta gikan sa "flying" nga koneksiyon, di maayong bentilasyon, overheating o di maayong pagmentinar sa breakers sa mga residential areas, establisemento, tindahan, ug wala matagad nga upos sa sigarilyo nga gilabay sa di saktong mga lugar nga maoy hinungdan sa grass fires.
Gihisgutan na kini ni Gillado sa AFP-PNP Press Corps Southern Mindanao media forum niadtong Oktubre 18, 2023.
“Nanguna gayud ang electrical short circuits niini sa mga residential areas nato kaning mga squatter. Kasagaran usab nahitabo kini tungod sa kainit sa mga gamit, mga wala mabantayi na mga appliances ug mga binuhatan sa mga tawo particularly ang kaning mga bata nga gadula og kalayo ug nagalabay og mga sigarilyo bisan asa,” dugang pa niya.
Niadtong 2023, mga insidente sa sunog sa dakbayan niresulta sa mga P121 milyon kantidad sa danyos subay sa pagsusi sa BFP-Davao.
Kini naglakip sa mga propedad ug uban pang mga kagamitan nga nadanyos.
Kasamtangan, ang BFP-Davao ug Team Davao Rescue nitubag na og kapin 15 ka mga insidente sa sunog ning bulan pa lang sa Enero karong tuiga.
ERRATUM: On the Front Page of SunStar Davao on January 12, 2024, it reads 120% INCREASE, when it should have been 20% INCREASE. The typographical error was not intentional, thus our apologies. – The editors