NILUSAD na ang Department of the Interior and Local Government (DILG) ug ang Philippine National Police (PNP) sa ikaduhang hugna sa proseso sa recruitment alang sa pagkapulis sa mga kanhi manggugubat sa Moro Islamic Liberation Front (MILF) ug Moro National Liberation Front (MNLF).
Kabahin kini sa pagtuman sa DILG ug MILF sa kasabutan sa administrasyon ni Presidente Ferdinand Marcos Jr. nga kalinaw ug seguridad sa tibuok nasud.
Nanguna sa aktibidad si DILG Secretary Benjamin Abalos Jr. sa Camp SK Pindatun, Parang, Maguindanao del Norte.
Sa datus, gikan sa 1,279 ka kinatibuk-ang ihap sa mga aplikante alang sa second batch sa recruitment, 690 na lang ka mga aplikante ang nakapasar sa higpit nga screening sa mga hingtungdan.
Ang maong ihap malakip sa lain pang 113 ka mga aplikante gikan sa unang batch sa recruitment ug ipailawom pa sa pipila ka mga screening lakip na ang Character and Background Investigation, Physical, Mental, and Dental Examinations, Drug Test, ug Final interview nga ipahigayon gikan sa Septyembre 16 hangtud 18, 2023.
Kahinumdoman niadtong Septyembre 9, 2023, unang gibuksan sa PNP Recruitment and Selection Service ang pagproseso sa ikaduhang batch sa mga aplikante nga kanhi miyembro sa MILF ug MNLF nga karon gustong mahimong pulis. (Edgar E. Fuerzas)