DUHA ka mga sakop sa Abu Sayyaf Group (ASG) ang nasignit sa mga awtoridad niadtong Miyerkules sa gabii, Mayo 29, sa Purok 4, Upper Ilang, Brgy. Ilang, Davao City atol sa Major Anti-Criminality/Terrorist Clearing Operation.
Mga suspek giila nga si Haider Arasani Anjawang, 31, minyo, molupyo sa Sitio Kapok, Barangay Panglayahan, Patikol Sulu; ug Al Faisal Abubakar Hassan, 40, ug molupyo sa Ayel Village, Barangay Santa Barbara, Zaboanga City.
Si Anjawang dunay warrant of arrest tungod sa kasong frustrated murder subay sa Section 29 sa Republic Act 10591 giisyu ni Honorable Judge Ambrosio B. De Luna, Presiding Judge sa Regional Trial Court sa Palawan Branch 51, Puerto Princesa City.
Nasakmit gikan sa mga suspek mao ang usa ka Caliber .45 SN 870111 nga dunay marka- Kimber Ultra Carry nga dunay nakasukip nga usa ka magazine nga dunay lima ka buhing bala ug usa ka fragmentation grenade.
Sa paghinabi kang Police Major Noel Villahermosa, station commander sa Bunawan Police Station, matud niya nga mga suspek bag-o lang niabot sa Davao City sa dihang nahitabo ang pagdakop kanila.
Una silang namonitor sa Panabo City kon diin nag-estar sila og duha ka adlaw.
Mga suspek nagtago-tago tungod sa ilang mga warrant of arrest. Gikan sa Patikul Sulu, niadto sila sa Palawan apan tungod sa samok nga sitwasiyon didto, nakahukom sila nga mobiyahe agi sa mala padulong sa Panabo City.
Atol sa ilang pagpuyo, namonitor sila sa intelligence unit.
Sa dihang gipangutana kon giunsa nila pagsulod sa siyudad bisan sa kahugot sa seguridad, dugang pa niya nga niabot sila sa Davao City pinaagi sa bangka aron nga makalikay sa Lasang checkpoint. Sa dihang nasayran nga nia sila dinhi, mga awtoridad nilusad og operasyon.
Kagahapon sa hapon, mga suspek gidala ngadto sa City Prosecutors Office aron nga pasakaan og kaso sa paglapas sa RA 10591 o ang Comprehensive Firearms and Ammunition Regulation Law ug RA 9516 o Illegal Possession of Explosives.
Gihupay ni Villahermosa ang kahadlok sa Dabawenyos pinaagi sa pag-ingon nga mga nahisgutan niari sa siyudad aron lang nga motago ug di mosabwag og kasamok. Dugang pa niya nga ang mga armas nga narekober, pangdepensa lang nila. (JCR)