2 batan-on nagpayuhot og druga, sikop

DAVAO DEL NORTE -- Duha ka mga batan-on ang malampusong nasikop atol sa gilusad nga buy-bust sa Purok 5, Barangay Poblacion, New Corella alas 10:55 sa gabii, Hulyo 22, 2024.

Nadakpan giila nga si alyas Biboy, 19-anyos, ulitawo nga molupyo sa Purok 16, Barangay Poblacion, Nabunturan ug alyas Jay, 22-anyos nga taga Purok 6, Barangay Santa Cruz, Nabunturan.

Gibutyag nga ang mga suspek nasikop pinaagi sa kapulisan sa New Corella Municipal Police Station, uban sa mga personahe sa 1st Davao del Norte Provincial Mobile Force Company (DNPMFC).

Matud pa nga mga suspek napalitan og usa ka sachet sa gituohang shabu sa nagpailang poseur buyer ug gawas sa maong sachet lain pang pakite sa shabu nga nagkantidad og Php 6,800 ang nakuha gikan sa posisyon sa duruha.

Lakip sab nga nasakmit sa mga pulis ang buy-bust money nga usa ka libo ka pesos, selpon nga touch screen Realme nga kolor itom ug ang kolor itom nga Raider 150 nga motorsiklo nga giingong maoy gigamit sa mga suspek sa ilahang transaksiyon sa druga.

Mga dinakpan gikustodiya na sa New Corella MPS samtang gihikay ang kasong paglapas sa Republic Act 9165 kun Comprehensive Dangerous Drugs Act of 2002 batok kanila. (DTV)