DUHA ka mga drug dens gipangguba samtang 10 ka mga personalidad giaresto atol sa managlahing anti-narcotic operation sa Philippine Drug Enforcement Agency (PDEA)-Davao sa Tagum City, Davao del Norte.
Base sa taho nga gihatag ni PDEA-Davao information officer Noli Nephi Dimaandal, mga ahente sa PDEA Davao del Norte Provincial Office, uban sa Tagum City Police Station milusad og drug bust alas 10 sa gabii niadtong Miyerkules, Agosto 15, sa Purok Bagani, Barangay Cuambugan.
Ang target sa operasyon giila nga si Marivic Tan Casis Cubio isip alyas Marivic Wong, 43, ug molupyo sa maong lugar. Si Cubio nadakpan sa pagpamaligya og usa ka gamay nga sachet sa shabu kantidad og P1,000 ngadto sa usa ka nagtakuban nga ahente sa PDEA.
Atol sa paglusad sa operasyon, nasayran nga dunay laing mga personalidad nga atua didto nga giila nga sila Rodelio Tan Casis, Relito Wong Tan Casis, Catherine Marqueda ug Louie Jay Ligutom. Gisikop sab sila tungod sa pagbisita sa lungga.
Mga awtoridad nakarekober og usa ka medium pack sa methamphetamine hydrochloride nga nagtimbang og 11 ka gramos uban sa street value nga P165,000 ug mga nagkadaiyang mga drug paraphernalia.
Sa laing drug bust, alas 11:30 sa gabii sa maong adlaw, mga ahente sa PDEA ug Tagum City Police Station miarangkada sa Purok 2, Barangay La Filipina, Tagum City.
Ang suspek nga giila nga si Mae Burang Barriga isip alyas Mae, 29, minyo, ug molupyo sa maong dapit nadakpan human nakigtransaksiyon sa ahente sa PDEA kon diin gibaligyaan niya og usa ka gamay nga sachet sa shabu kantidad og P1,000.
Gawas kang Barriga, dunay lain pang upat ka mga bisita sa drug den nga nadakpan nga giilang sila si Randy Villegas, Arlyn Silvosa, Jonard Avelino ug Louie Art Llesis.
Atol sa operasyon, nasakmit sulod sa pinuy-anan ni Barriga ang usa ka dakong medium pack ug 10 ka gagmay nga plastic sachets sa shabu nagtimbang og kapin kun kulang (10) gramos uban sa street value nga P150,000 ug nagkadaiyang drug paraphernalias.
Mga suspek gidetinar sa selda sa PDEA Regional Office 11 samtang ang mga nasakmit nga mga ilegal nga butang gitunol ngadto sa Laboratory Service sa maong buhatan alang sa eksaminasyon.
Mga kasong paglapas sa Sections 5, 6, 7, 11, 12 ug 15, Article II sa Republic Act 9165, labing nailhan isip Comprehensive Dangerous Drugs Act of 2002 giandam na batok kanila.