COTABATO CITY -- Gipaspasan karon sa kapulisan ang gihimong imbestigasyon human nibusikad ang duha ka M79 grenade launchers alas 2:00 sa kaadlawon, Martes, Septyembre 5, 2023, sa Buluan sa probinsiya sa Maguindanao del Sur.
Atol sa pagbusikad naangol si Tato Esmael, 43, minyo, ug nagpuyo sa Barangay Digal, Buluan.
Gibutyag ni Maguindanao del Sur Police Provincial Director Colonel Roel Sermese nga duha ka bala sa M79 grenade launchers ang miigo sa balay ni Esmael.
Tungod sa kakusog sa pagbusikad, naangol ang biktima nga naigo sa tipaka, hinuon, luwas ang iyang pamilya.
Dali siyang gitabang sa pamilya ug gihatud ngadto sa Buluan District Hospital nga giingong naa sa talandugong kahimtang.
Ang biktima giingon nga lider sa Moro Islamic Liberation Front (MILF).
Padayon pang nangalap og mga ebidensiya ang kapulisan sa Buluan Municipal Police Station aron nga matumbok ang nagpabusikad sa grenade launcers.