MAKILALA, North Cotabato -- Wa na magpa-alang-alang ang mga molupyo sa usa ka barangay sa lungsod ug gipanglikida gilayon ang tulo ka mga banakon (King Cobra) nga miatake sa kabalayan.
Sumala kang Reymond Ocay nga una na nilang napatay ang usa ka banakon nga dunay gitas-on nga pito ka tiil nga giingong nisulay sa pagsaka sa pugaran sa manok sa balay ni Shiela Hogonos sa Purok Narra, Barangay Malasila sa naasoy'ng lungsod alas 10:00 sa buntag niadtong Miyerkules, Enero 22.
Samtang sa pagka-alas 2 ang takna sa hapon sa maong adlaw, nasiplatan na sab sa mga molupyo ang pinakadako nga banakon nga dunay gitas-on nga napulo ka tiil nga nagpahipi sa nataran sa balay ni Hogonos nga mora'g nasuko kay gipatay ang iyang kaliwat.
Daling niresponde ang mga batan-on sa maong barangay ug gitabangan og puspos ang banakon ug gihapsan og sundang ang ulo niini.
Sumala sa mga katigulangan sa maong lugar nga lalaki ug babaye ang duha ka banakon nga napatay sa mga molupyo ug posibleng magtiayon sila.
Kahinumdoman nga niadtong miaging adlaw, usa sab ka banakon ang napatay sa molupyo sa Barangay Kawayanon sa maong lungsod.
Nasayran nga duna nay namatay nga molupyo sa Makilala ug Magpet sa probinsiya human gipahit og King Cobra niadtong miaging tuig.
Tungod niini, gibati og kahadlok ang mga molupyo sa Makilala, ilabi na gyud kadtong nanimuyo sa tiilan lang Mt. Apo sa pagpanggawas na sa mga lala nga bitin.