BANSALAN, Davao del Sur -- Duha pa lang sa 25 ka mga barangay sa lugar ang gideklarang drug-free sa kapulisan ug nakakuha na og clearance certificate.
Gibutyag ni Police Senior Inspector Rodante Varona, hepe sa kapulisan, nga dili basta makadeklara og drug-free sa usa ka lugar kung dili masegurong limpyo na kini sa illegal nga druga.
Mga Barangay New Clarin ug Sto. Niño pa lang maoy nadeklara sa kapulisan nga limpyo na sa druga.
Sumala ni Varona nga padayon nilang giukoy ang ubang anaa sa drug watch list sanglit ang uban niini milayas na sa lungsod.
Aminado ang kapulisan nga aduna gihapoy mga nagtagu-tago nga tigpayuhot og druga apan mga dayo na lamang kini gikan sa ubang dapit.
Nasayran nga pulos nasikop na ang mga tawong iladong tigpayuhot og druga sa lugar nga gitawag og High Value ug Street Level Target.
Mas gihugtan sa kapulisan ang pagpaniid sa illegal nga druga sanglit ang Bansalan mao ang utlanang bahin sa mga probinsya sa North Cotabato ug Maguindanao.
Sa pikas bahin, gibutyag sa kapulisan nga padayon sab nilang giukoy ang grupo sa mga batan-on nga apil sa mga gang aron mapakgang.
Sa taliabot nga abli sa klase makig-alayon ang kapulisan sa mga tunghaan sa lugar aron masumpo ang grupo sa mga batan-on nga hayan mohimo og kaguliyang sa taknang mag-abot sila.
Hinuon, kanunay nagpatrolya ang kapulisan aron di makahimo og kasamok ang grupo sa mga batan-on panahon sa kagabhion. (OBD)