KIDAPAWAN CITY - Blangko pa ang awtoridad sa motibo sa pagpatay sa duha ka tawo nga nakaplagan alas 7:30 sa buntag, Dominggo, Enero 7, 2024 ning siyudad.
Ang mga biktima nagpangedaron og 25 hangtud 35-anyos.
Gibutyag ni Kidapawan City Chief of Police Lieutenant Colonel Dominador Palgan nga nakadawat sila og taho sa duha ka patay nga lawas sa tawo didto sa Purok Avocado, Sitio Lika, Barangay Onica, Kidapawan City.
Dili taga Barangay Onica ang mga biktima gumikan walay nakaila niini sa mga molupyo sa maong barangay.
Posibleng biktima sa summary execution ang mga biktima nga gilabay lamang sa Brgy. Onica, segun sa awtoridad.
Nakasuot ang duruha og itom nga t-shirt, ang usa itom ang shorts samtang gray sa iyang kauban.
Pulos dunay mga samad pinusilan ang mga biktima nga maoy hinungdan sa ilang kamatayon.
Gidala ang patay nga lawas sa mga biktima sa usa ka punerarya sa dakbayan samtang nagpadayon ang imbestigasyon sa kapulisan.