LAUMAN ang tumang kaguot nga sitwasiyon sa trapiko ang Jose P. Laurel Avenue kun Bajada, Davao City human nga duha ka linya sa kalsada ang temporaryo nga sirad-an gumikan sa nagpadayong road construction sa dapit.
Sa pahibalo nga gipagula sa Department of Public Works and Highways-Davao(DPWH-Davao) pinaagi sa ilang official Facebook page nga DPWH Region XI, gisaysay niini nga magsugod ang pagsirado Sabado, Septiyembre 3, 2022, ug molungtad kini hangtud Enero 5, 2023.
Kini aron mahatagan og higayon ang pagpadayon sa pagbutang sa mga lateral box culvert ug sa mga aktibidad kabahin sa road construction.
Ang motorista nga si Marilou Tayag-Mansueto, taga Buhangin, Davao City,nagbutyag nga mangita na lang siya og alternatibo nga rota pauli sa ilang balay sa Fortune Homes sa Lanang.
"Para hindi ako maipit sa traffic maghahanap nalang ako talaga ng alternative routes going to my home from my work in downtown," ingon ni Marilou nga dunay kaugalingong sakyanan.
Kalbaryo nga sitwasiyon alang sa usa ka public utility vehicle (PUV) driver nga si Ernesto Duhaylungsod human nga posible nga maipit siya sa maong dapit.
"Parehas nako ini nga Route 10 nga moagi gyod diha moubay nalang gyod pod me sa trapiko, dugay mi ka round, dugay kakuha sa boundary, lugi, mahal pa ang presyo sa lana, samot," ingon ni Ernesto sa SuperBalita Davao.
Luyo niini, ang buhatan sa City Traffic Transport and Management Office (CTTMO) mobutang og dugang mga personahe sa dapit aron sa paggiya sa dagan sa trapiko.
Kini nga butang, dugang gipangandaman sa CTTMO pinaagi sa mga dugang personahe gawas sa mga nauna nang mga traffic enforcers nga ilang gipang-deploy sa dapit.
Nangayo og despensa ang DPWH-Davao ngadto sa publiko sa maong hitabo ug naghangyo sa mga motorista nga mogamit sa mga alternatibong rota aron di maipit sa duot sa trapik. (Uban ang taho sa DPWH-Davao)