ANG duha ka mga menor de edad nga nalambigit sa bag-ohay nga coastal road vandalism wala pa makigkita kang Davao City Mayor Sebastian Duterte alang sa behavioral consultation.
Si Davao City Police Office (DCPO) Spokesperson Captain Hazel Tuazon nibutyag pinaagi sa phone interview nga ang maong mga menor de edad na-rescue na niadtong Lunes sa buntag, Agosto 21, 2023.
“Na-rescue nato karon sila ug makigkita sila kay Mayor Baste regarding sa ilahang gibuhat," ingon ni Tuazon.
Giila sa awtoridad ang mga menor de edad nga sila si alyas Brix, 17-anyos ug alyas Niwang, 13-anyos. Ang duha pulos residente sa Purok 5, Barangay 76-A, Bucana, Davao City.
Gitug-an usab sa opisyal nga gitabangan na sila sa nagkadaiyang ahensiya lakip na ang Department of Social Welfare and Development-Davao (DSWD-Davao) sa maong hitabo.
“Giadto sila sa barangay tanod ug mga social workers nato para ma-asikaso ning mga minors," dugang ni Tuazon.
Kahinumdoman nga dunay mga bahin sa coastal road ang gibandalan og mga pulong sa pagbugal-bugal niadtong Agosto 21, 2023.