2 namomba nasapon sa CCTV

Hulagway iya sa Pikit Municipal Police Station
Hulagway iya sa Pikit Municipal Police Station

GISUSI na sa mga awtoridad ang mga kuha sa closed-circuit television (CCTV) camera sa Pikit, Cotabato Province sa natigayong pagpanglabay og granada alas 4:30 sa hapon niadtong Biyernes, Oktubre 7, 2022.

Matud ni Pikit Chief of Police Major Maxim Peralta nga dali na karon ang pagtumbok sa mga suspetsado nga nanglabay og granada gumikan sa kuha sa CCTV.

Kahinumdoman nga duha ka wala mailhing tawo nga sakay sa motorsiklo ang miitsa'g granada atubangan sa Bogarts Motorshop sa Fedel Flores Street, Barangay Poblacion sa Pikit.

Usa ka kustomer sa motorshop ang naangol sa pagbusikad sa granada nga nailang si Pangatong Abdulraud Mustapha, 29, ug ang tag-iya sa shop nga si Reformido Regulacion, 64.

Gidala dayon ang mga samaron ngadto sa Cruzado Medical Hospital human makaangkon og mga igo sa nagkadaiyang parte sa kalawasan sa mga tipaka sa granada.

Hinuon, gibutyag sa mga doktor sa CMH nga luwas na ang mga biktima ug nagpaalim na lang sa ilang mga samad.

Ang pagpanglabay og granada nahitabo dungan sa gipahigayon nga panagpulong sa mga miyembro sa Municipal Peace and Order Council (MPOC) nga gipangulohan ni Pikit Mayor Sumulong Sultan, militar ug kapulisan gumikan sa sunod-sunod nga kagubot sa lungsod.

Padayon ang imbestiagasyon sa Pikit Municipal Police Station sa hitabo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph