DUHA ka miyembro sa New People’s Army (NPA) ang napatay sa engkwentro sa militar alas 10:58 sa buntag niadtong adlaw nga Sabado, Oktubre 3, 2020, sa probinsya sa Cotabato.
Giila ang mga nakabsan sa kinabuhi nga sila alyas James nga taga Paquibato District Davao City ug alyas Nimno nga molupyo sa probinsya sa Davao Del Sur.
Sa taho gikan sa 901st Brigade nga samtang nagpahigayon og combat operation ang mga sakop sakop sa 72nd Infantry Battalion Philippine Army nga gipangulohan ni Lieutenant Colonel Rey Alvarado sa Purok 3, Barangay Malire, Antipas, North Cotabato ilang na-engkwentro ang gibana-banaan nga 30 ka mga NPA.
Milungtad sa 30 minutos ang sinukliay og mga bala tali sa duha ka pundok gamit ang mga tag-as nga matang sa armas.
Nakugang ang mga sibilyan sa buto-buto sa armas hinungdan nga nanghikling sila paingon sa mga luwas nga dapit.
Miatras sab dayon ang mga rebelde nga gipangunahan ni Kumander Joel sa NPA Guerilla Front 53 sa Southern Mindanao Regional Party Committee paingon sa bukiron nga parte sa Antipas.
Walay naangol sa mga sundalo samtang duha ang napatay sa walhong grupo.
Narekober sa mga sundalo gikan sa mga napatay nga NPA ang usa ka M14 rifle, 3 ka magazine, bandoller, improvised explosive device, 1 switch detonator, duha ka 7.62 mm link ball, mga importanteng dokumento sa mga NPA, cooking materials, medical paraphernalia, mga bala ug mga personal na kagamitan.
Sa kasamtangan padayon nga gilutos sa militar ang mga NPA sa bukiron nga parte utlanan sa Antipas ug Magpet, Cotabato.