CARMEN, North Cotabato -- Duha ka armadong pamilya nga sakop sa usa ka Moro front ang nagkabinakbakay tungod sa dumot sa yuta nga giugmad.
Nahitabo ang pinusilay alas 2:00 sa hapon niadtong Dominggo didto sa Barangay Tunganon, Carmen.
Sa taho gikan sa 602nd Brigade, Philippine Army, nasayran nga pamilyang Tunga ug pamilyang Rahinto ang nagkabinakbakay nga milungtad og 45 minutos.
Tungod niini, daling mihikling ang mga molupyo sa lugar aron nga di maipit sa kagubot.
Nahunong lang ang binakbakay tali sa duha ka pamilya sa diha nga nagpatunga ang mga barangay opisyal ug Muslim elders.
Dunay taho gikan sa mga mibakwit nga mga molupyo nga dunay usa ang napatay samtang laing tulo ang nasamdan.
Duna nay gimandoan nga mga tawo si Carmen Mayor Roger Talinio aron nga resolbahon ang dumot sa duha ka mga pamilya sa maong dapit.