GIPANGDALA sa Sta. Ana Police Station ang tulo ka mga babaye human nagbugno kay gitagoan ang kamunggay nga braha alas 4 sa hapon niadtong Sabado, Nobyembre 2, didto sa Purok 7, Isla Verde, Barangay 23-C, Davao City.
Una niini, naglingaw ang tulo ka babaye sa pagdula og kamunggayay, apan usa sa mga misud-ong sa dula nakakita nga gitagoan ni alyas Marissa ang “Alas Kamunggay” ug gilayong gisaka sa iyang dala nga braha maong mikaransa si Helen ug ang kauban niini nga si Jenny.
Giingong miinit ang ulo ni Helen ug Jenny dihang pildihan na sila, diay ilang nasuta nga perteng pagpanikas ni Marissa.
Sa kalagot sa duruha, ilang gitabangan og dumog si Marissa hinungdan nga giadtoan sila sa ilang purok leader dayon nagtawag sila og pulis.
Pag-abot sa Sta. Ana PNP, nakahiagom og daghang samad kinarwasan sa bukton ug nawong si Marissa diin perte nang kalkaga sa buhok.
Gitambagan sila sa duty desk officer nga sa barangay sila maghusay. (JPC)