TULO ka mga drug pushers ang nadakpan sa mga awtoridad sa managlahing lugar dinhi sa Davao Region niadtong Huwebes, Marso 10, 2022.
Unang nadakpan alas 12:30 sa kaadlawon didto sa Magdum, Tagum City si alyas Gerry, 24-anyos, taga Barangay New Visayas, Panabo City, kinsa gikonsiderang notado sa nahisgutang siyudad.
Nadakpan ang suspek sa hiniusang puwersa sa Tagum City Police Station, Regional Mobile Force Battalion (RMFB)-Davao, Regional Special Operations Group- Regional Police Drug Enforcement Unit (RSOG-RPDEU)-Davao, ug ang 1st Davao Norte Provincial Mobile Force Company (DNPMFC).
Nakuha sa posisyon sa dinakpan ang gituohang shabu nga motimbang sa 5 gramos nga dunay street value nga P34,000 nga buy-bust money ug uban pang ebidensiya.
Samtang alas 5 sa hapon sa maong adlaw, nadakpan sab ang laing duha ka pusher sa kapulisan sa Digos City Police Station kon diin usa sa mga suspek number 7 ug na-categorized isip high value individual sa regional target list sa kapulisan sa Davao del Sur.
Gikasa ang operasyon batok nila alyas Choy, 38-anyos, ulitawo, usa ka tattoo artist ug alyas Jay-ar, 19-anyos, ulitawo, didto sa Purok Ubas, Diego Silang Street, Barangay Zone 3, Digos City.
Sumala ni Digos City Acting Chief of Police Hamlet Lerios nga nakadawat sila og impormasyon gikan sa kasaligan nga impormante sa ilegal nga binuhatan sa suspek hinungdang gikasa ang operasyon.
Nakuha sa posisyon sa mga dinakpan ang gituohang shabu nga motimbang sa 1.23 gramos nga dunay street market value P18,450 ug uban pang mga ebidensiya.
Mga dinakpan sa duha ka operasyon gipasakaan na og kasong pagsupak sa Republic Act 9165 kun Comprehensive Dangerous Drugs Act of 2002 didto sa korte.