TULO ka mga sibilyan ang samdan human nga napagan sa nahitabong engkuwentro sa duha ka grupo sa Moro National Liberation Front (MNLF) alas 2:00 sa hapon, Abril 29, sa Datu Odin Sinsuat, Maguindanao del Norte.
Gibutyag ni Maguindanao del Norte Police Provincial Director Colonel James Gulmatico nga nagka-engkuwentro ang grupo nila Kumander Doy Kamsa sa MNLF Sema faction ug Kumander Udi Sumlay sa MNLF Misuari faction sa Sitio Chicago, Barangay Bagoinged, Datu Odin Sinsuat sa maong probinsiya.
Tungod sa grabeng sinukliay og mga bala, mga molupyo sa dapit daling nanghikling paingon sa mga luwas nga lugar.
Apan tulo ka mga sibilyan ang nasamdan human maigo sa mga saag nga bala sa dihang naipit sa pinusilay.
Giingong tag-duha sab ang patay sa magkaaway nga grupo nga dunay personal nga dumot sa ilang matag pamilya gumikan sa yuta nga ilang giugmad.
Nahunong lang ang pinusilay sa diha nga nahiabot ang puwersa sa militar, kapulisan, Muslim elders, lokal nga opisyal ug mga lider sa MNLF.
Gitakda nga tapukon sa GRP-MNLF Peace panel ang duha ka grupo aron resolbahon ang ilang dumot sa malinawon nga panagsabot.