GIANDAM na sa City Health Office (CHO) ang mga detalye uban sa mga hingtungdan sa bivalent Covid-19 vaccine nga ikatulong booster sa Davao City.
Gisulti ni CHO health information education officer Daryl Guevarra, atol sa Madayaw Davao program sa 87.5 FM Davao City Disaster Radio (DCDR) nga gisibya niadtong Hunyo 26 nga: “Sa karon, ongoing ang pagplantsa sa rollout nga ipahigayon. Naa’y final meeting with private partners and hospitals ipahigayon sa hapon. If ready na, i-announce nato sa official FB sa City Government of Davao and CHO.”
Tug-an niya nga ang bivalent Covid-19 vaccines naglangkob og duha ka komponente: usa magtarget sa orihinal nga lama sa kagaw aron ihanyag ang "broad protection" batok Covid-19, ug ang laing gitarget mao ang omicron variant alang sa mas gipalambo pa nga proteksiyon batok sa Covid-19 nga mugna sa niini ang "specific variant".
Matud niya nga ang vulnerable sectors nag-edad og 18-pataas, naglakip sa health care workers, senior citizens, ug persons with comorbidities iprayoridad sa bivalent vaccine rollout kay sila mao ang mas "susceptible" sa Covid-19.
Apan giklaro ni Guevarra nga kadto lang nga dunay "first and second booster doses" makapahimulos sa ikatulong booster bivalent vaccine. (Uban sa taho sa CIO)