UPAT ka mga establisemento ang gidakop human nakalapas sa mga ordinansa sa anti-smoking ug liquor ban sa Vices Regulation Unit (VRU) sa Davao City.
Si VRU officer-in-charge PCol. Hernando Q. Las (Ret.) naghisgut nga mga establisemento nga nakalapas sa nahisgutang mga ordinansa sa siyudad mao ang mga bars nga nahimutang sa Lanang, Narra Street, Jacinto Street, ug sa Marfori Road gikan Enero hangtud Abril 2023.
Dugang pa niini nga sa pagkakaron, duha na lang ka bars ang pabiling gisira kay ang laing duha nga nahimutang sa Marfori Road ug Jacinto Street nituman na sa gikinahanglan nga rekisito sa Business Bureau sa dakbayan.
Matud ni Las nga ang ilang mando mao ang pagrekomenda ngadto sa Business Bureau sa pagsira sa operasyon sa mga establisemento nga nakahimo og kalapasan.
Gisulti sa opisyal nga atol sa surpresa nga pagsusi uban ang San Pedro Police karong tuiga, nakapamulta na sila og mga 60 ka masinupakon nga kantidad og P3,000 matag usa.
“Mostly, continuous man ang among follow-up ana sa katong naga-violate lang, kay usahay maabtan mig buntag ana, ug halos kauban ra pod namo ang pulis kay ang pulis sila na ga-condone ana,” tug-an ni Las.
“Kami ga-issue lang mi og citation ticket,” dugang pagklaro niya.
Samtang gisulti sab sa opisyal nga mga “80 percent” nagtuman sa anti-smoking ug liquor ban ordinance sa siyudad.
Gisulti ni Las nga ang laing 20 porsiyento higpit nga gisusi sa VRU ug Business Bureau.
Ubos sa City Ordinance 004-30, ang siyudad nagdili sa pagbaligya ug pagserbi og makahubog nga ilimnon gikan 1:00 sa kaadlawon hangtud 8:00 sa buntag.
Samtang ang Ordinance 0367-12, Series of 2012, labing nailhan isip "The New Comprehensive Anti-Smoking Ordinance of Davao City" nagdili sa Dabawenyos nga manabako sa publiko gawas sa mga gidesignar nga lugar sa mga establisemento nga "smoking areas." (ICE)