KIDAPAWAN CITY -- Nabalaka na ang mga ginikanan sa pagtaas sa ihap sa mga nagkasakit og dengue sa Soccsksargen karong tuiga.
Misaka na sa 3,211 nga kaso sa dengue ang natala sa Department of Health (DOH)-Soccsksargen, base sa Regional Epidemiology and Surveillance Unit (RESU).
Kini ang gibutyag ni Dr. Imelda Quiñones, DOH-Center for Health and Development chief.
Kadaghanan sa mga giigo sa dengue mga kabataan ilabi na kadtong mga masuso.
Lima na ang namatay sugod niadtong Enero hangtud unang semana sa Marso ning tuiga.
Tulo niini nagagikan sa North Cotabato, partikular sa mga lungsod sa Libungan, Makilala ug Kidapawan samtang duha sa South Cotabato.
Gipasabot ni Quinoñes nga dunay tulo ka klase sa dengue nga mao ang “without warning signs”, “with warning signs” ug “severe dengue”.
Gipaigmat sa DOH-Soccsksargen ang publiko sa pagtaas sa ihap sa nagkasakit og dengue sa rehiyon.
Samtang, nagpadayon ang ahensiya sa ilang pagpaniid pinaagi sa pagtumbok sa mga hotspot area ug clustering.
Buot pasabot sa clustering nga tulo ka kaso sa dengue ang natala sa upat ka sunod-sunod nga semana samtang ang hotspot sab sa sobra sa upat ka tawo ang nagkasakit sa dengue sa duha ka sunod-sunod nga semana.
Sa North Cotabato nga mga hotspot area mao ang Barangay Tacupan sa Carmen, Barangay Poblacion sa Kabacan, ug Barangay Sadaan sa Midsayap.
Sa pagtaas sa ihap sa nagkasakit og dengue sa Soccsksargen, gilunsad sa DOH ang enhanced 4S strategy aron mapugnan ang pagkuyanap niini.