MOKABAT na sa 500 ka mga indibidwal ang nadakpan sa kapolisan sa Davao del Sur human nasakpang wa motuman sa curfew hour nga gipatuman gikan alas 6 sa gabii hangtud alas 6 sa sayong kabuntagon.
Sa datus nga gipaguwa sa Davao del Sur Police Provincial Office (DSPPO)) gikan Marso 19, dihang gisugdan ang enhanced community quarantine (ECQ) sa lalawigan, ubay-ubay na sab ka mga sakyanan ang wa makasulod tungod sa border lockdown nga gipatuman sa Davao Region.
Sumala ni Police Colonel Alberto Lupaz, officer-in-charge sa DSPPO, nga hugot sab nilang gi-implementar ang 24-hour liquor ban mao nga daghan na ang nadakpan sa mga kalungsuran.
Gawas niini, aduna sab 15 ka mga tawo sa siyudad sa Digos, ang nakamulta human wa magsul-ob og face mask, 21 ka mga tawo ang gisikop tungod sa pagsukol sa mga otoridad ug 30 na ka mga tawo ang nadakpan ug gikasohan sa illegal gambling partikular ang mga nagduwa og baraha.
Mapasalamaton si Lupaz human wa’y bisan usa sa ilang sakop nga natakdan sa Covid-19 apan nagsubo sab sila sanglit aduna’y 59 ka mga kaubanan sa laing dapit ang nag-positibo sa kagaw diin tulo na ang namatay.
Mas pahugtan pa sa DSPPO ang ilang alerto human gipatuman sa rehiyon ang extended enhanced community quarantine (EECQ). (Orlando B. Dinoy)