69 tawo gitabang sa CDRRMO atol sa Indak-Indak; 50 sa Pamulak

(File Photo)
(File Photo)

MOABOT sa 69 ka mga tawo ang gitabang sa City Disaster Risk Reduction and Management Office (CDRRMO) atol sa selebrasyon sa Indak-Indak sa Kadayawan Festival niadtong Sabado, Agosto 19, 2023.

Gitug-an ni CDRRMO Operations Assistant Ezzra James B. Fernandez sa Davao City Disaster Radio (DCDR), Martes, Agosto 22, nga ang pinakadaghan nga mga gitabang sa ahensiya atol sa Indak-Indak Street dance.

Gisulti niya nga kasagaran niini nagreklamo bahin sa pagkaluya sa lawas ug nakuyapan. Gawas sa pagkakuyap, nakasinati sab sila og "dehydration" tungod sa taas nga temperatura kay ang aktibidad gisugdan og alas 2 sa hapon.

Ang 69 ka mga tawo nakadawat dayon og pasiunang pag-atiman, samtang ang uban gidali sab paghatud ngadto sa mga ospital aron nga matambalan.

Gitug-an sab ni Fernandez nga usa sa mga misalmot sa aktibidad nakasinati og paggahi sa iyang lawas tungod sa "dehydration" busa gidali siya paghatud ngadto sa Southern Philippines Medical Center (SPMC) alang sa dinalian nga medikal nga pagtagad.

Nagpahimangno ang CDRRMO sa matag usa nga ang pag-inom og tubig kinahanglan gyud, ilabi kadtong nabulad sa init. Hinungdan nga nisuhestiyon si Fernandez nga mga misalmot kinahanglan dunay usa ka personahe nga nakadesignar aron sa paghatag og tubig sa mga mananayaw nga nabulad sa init.

Nasayran ni Fernandez nga ubang mga partisipante wala mokaon una sa ilang pagpasundayag nga miresulta nga nakuyapan.

Samtang sa Pamulak sa Kadayawan niadtong Dominggo, Agosto 20, gitabang sa CDRRMO ang mga 50 ka tawo samtang sa Konsierto sa Kadayawan dunay usa.

Hinuon gipasalamatan ni Fernandez ang mga personahe sa Barangay Disaster Risk Reduction and Management Committee (BDRRMC) nga nadestino sa estratehikong mga lugar palibot sa ruta sa parada ug street dancing. Dugang pa niya nga kung wala ang ilang pagresponde sa pagtabang sa mga tawo nga nagkinahanglan lisud gyud kaayo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph