NAGKAHIUSA nga gipahibawo sa Commission on Elections (Comelec-Davao Region) ug Police Regional Office (PRO-Davao Region) Miyerkules, Septyembre 28, 2023, nga dunay walo ka mga areas of concerns nga namonitor alang sa 2023 Barangay Sangguniang Kabataan Elections (BSKE).
Sa AFP-PNP press briefing, duha ka mga tag-as nga opisyal sa rehiyonal nga ahensiya sa kagamhanan nagsulti nga nihimo na sila og press conference sayo ning semanaha aron nga palig-unon ang ilang pagmonitor sa giingong mga lugar gikan sa nagkadaiyang probinsiya sa rehiyon. Kini nga mga lugar gipailawom sa kategoriya nga "yellow code".
Nagpaimplementar ang Comelec-Davao Region og color-coding scheme aron nga maila ang mga hotspots sa matag lugar sa Davao Region. Kini mao ang "yellow" (kung ang usa ka lugar duna nay kasaysayan sa election-related nga mga insidente); green (malinawon o way kasaysayan sa mga insidente sa eleksiyon; orange (presensiya sa armadong grupo); ug red (kritikal nga mga lugar).
“We have eight barangays that are under yellow and these are from Davao del Sur, Davao del Sur, and Davao City” tug-an ni Atty. Gay Enumerables, assistant regional director sa Comelec-Davao Region.
Apan giklaro ni PRO-Davao Region Spokesperson Major Catherine Dela Rey nga wala pa nila mahingpit ang listahan sa areas of concerns una ipagawas ngadto sa publiko.
“As of now dili pa sa namo ihatag ang final details kay lisod pud kung di ni siya i-finalize. Kailangan pa siya'g approval from Comelec," sumala niya.
Base sa datus nga gihatag sa Comelec-Davao Region, dunay 9,558 cluster precincts sa tibok rehiyon ug matag polling place o tulunghaan bantayan og duha ka pulis.
“It is enough but we also need volunteers. But as per count, enough na ang personnels for polling places yun naman kase yung standard operating procedure natin in every previous elections,” pagklaro sa tigpamaba sa PRO.