83 kaso sa HIV/Aids natala sa Davao City Enero-Pebrero 2023

NAKATALA ang Davao City og 83 ka mga kaso sa human immunodeficiency virus-acquired immunodeficiency syndrome (HIV/Aids) karong tuiga gikan sa Enero hangtud Pebrero, sumala sa Reproductive Health and Wellness Center (RHWC) Miyerkules, Abril 19, 2023.

Sa kinatibuk-ang 83 ka mga kaso, 54 ang natala niadtong Pebrero ug ang nahabiling 29 ka kaso natala niadtong Enero. Kini nagdugang ngadto sa mga kaso sa Davao City sukad 1994, nga naa na karon sa 4,370 ka mga kaso.

Bisan tuod kon nakasinati sila og kalangay sa "confirmatory testing", si RHWC head Dr. Jordana Ramiterre nagsulti ngadto sa SunStar Davao nga mga kaso karong tuiga mas taas sa mga kaso nga natala atol sa samang panahon sa miaging tuig.

Gisulti ni Ramiterre nga ang taas nga ihap sa nakompirma nga mga kaso karong tuiga tungod sa kompiyansa sa publiko nga magpasusi alang sa HIV/Aids.

"Somehow, nag-normalize tayo sa post-pandemic. Early last year, kakatapos lang so hindi pa masyado nag-access ang mga peope but now people are more confident to access testing whether it's facility-based, community-based, or individual testing," matud niya atol sa paghinabi kaniya.

Ug sa samang higayon, ang age group sa populasyon sa mga kaso nga natala karong tuiga nagpabilin nga midominar ang 25 hangtud 34 anyos, gisundan sa 15 hangtud sa 24 anyos apan matud ni Ramiterre nga namatikdan nila ang pagtaas sa 15 hangtud sa 24 anyos nga populasyon nga positibo sa HIV/Aids.

"It's increasing but it did not surpass the 25 to 34 years old population. Probably also because for the younger people, baka lang hindi pa sila gaano nag access ng testing," dugang sa RHWC head.

Sayo ning bulana, ang nasudnong Department of Health nagpagawas sa HIV/Aids and ART Registry sa Philippines report alang sa Pebrero 2023.

Nagpakita kini nga ang Davao Region dunay 84 ka mga kaso sa HIV/Aids, nga maoy ikaupat nga pinakataas sa ubang mga rehiyon sa nasud. (ICM)