MAGUINDANAO -- Nakasinati na sab og sobrang kainit sa panahon ang probinsiya sa Maguindanao.
Sa bulag nga talaan nga gipagawas sa Maguindanao Provincial Agriculture Office anaa na sa P130 milyon ang kantidad sa danyos sa pananom nga mais ug humay nga nadaot sa kainit sa panahon.
Matud ni Maguindanao Agriculture Officer Vic Giabel, nga 29 na sa 36 ka lungsod sa probinsiya ang naapektuhan sa kainit sa panahon sugod sa bulan sa Enero hangtud sa kasamtangan.
Gisubay na sa buhatan ni Giabel ang eksakto nga ihap sa mga mag-uuma nga sentro nga giigo sa hulaw.
Apan sa inisyal nga pagtantya sa Maguindanao Agriculture Office (MAO), posibling moabot sa 8,500 ka mag-uuma ang naapektuhan sa ting-init.
Ang mga lungsod nga grabeng naapektuhan sa kainit mao ang Buldon, Barira, Matanog, Upi, Talayan, Datu Salibo, Salipada K. Pendatun, Datu Hoffer, Sultan Mastura, Sultan Kudarat, Paglat, Datu Paglas, Datu Montawal, Pagalungan ug Pandag.
Girekomenda na ni Giabel sa Bangsamoro Autonomous Region in Muslim Mindanao (BARMM) ang pagpahigayon og cloud seeding sa probinsiya aron makunhuran ang epekto sa hulaw.
Plano na sab sa mga miyembro sa Sangguniang Panlalawigan nga ipailawom sa estado sa kalamidad ang probinsiya.