MAGSAYSAY, Davao del Sur -- Usa ka 9-anyos nga batang babaye ang nakit-ang naligo sa kaugalingong dugo human napuno sa samad tinigbasan ang kalawasan ug ulo niini luyo sa gipatumang enhanced community quarantine (ECQ).
Gisulti ni Police Major Jeffmar Tercero, hepe sa Magsaysay Municipal Police Station, kagahapong adlawa, Dominggo, Abril 26, nga ang biktima giila nga si alyas Eunice, usa ka Grade 3 pupil sa Maibo Elementary School.
Si Tercero nagbutyag nga nakurat ang mga opisyal sa barangay dihang nabangalan ang brutal nga krimen sa kamatayon sa menor didto duol sa sapa sa Purok 6, sa Barangay Balnate, niadtong Sabado sa buntag.
Dugang niini nga gipadala na ang ilang mga personahe aron kumpirmahon ang taho nga nasiplatan ang presensya sa mga lawless armed groups (LAGs) duol sa crime scene.
Sa kasamtangan, wala pa’y matudlong suspek ang mga otoridad kung kinsa ang anaa sa likod sa linoog nga krimen.
Nanawagan sab sila sa publiko nga motunol og impormasyon kung aduna’y kasayuran sa bansagon sa mga suspek aron gilayong masikop ug makasohan.
Gikasubo sa kapolisan ang nahitabo sa ngilngig nga krimen luyo sa giatubang nga krisis tungod sa Covid-19. (Orlando B. Dinoy)