COTABATO CITY -- Naangol ang deputy director sa Maguindanao Provincial Prosecution Office ug ang lain pang duha ka paryente niini human gi-ambush alas 2:10 sa hapon nadtong Biyernes, Pebrero 21, sa siyudad.
Giila ang mga biktima nga sila abogado Tucod Ronda ug iyang mga paryente nga sila Abol Taya Ronda ug Nestor Ronda, mga molupyo sa Purveyors Subdivision, Barangay Rosary Heights 11 sa maong siyudad.
Matud ni Cotabato City Police Director Colonel Portia Manalad nga pauli na ang mga biktima biktima sakay sa usa ka Toyota Grandia nga dunay plaka nga PN 030105 gikan sa nag-ampo sa mosque.
Apan pag-abot nila sa Penafrancia Village, RH 11 sa siyudad, kalit lang silang gibanhigan sa duha ka wala mailhing tawo gamit ang M16 Armalite rifle ug kalibre .45 nga pistola.
Abtik sab nga miikyas ang mga suspetsado sakay sa kolor puti nga Toyota Innova sa dihang gipabuthan sab sila sa pulis nga nagpuyo sa maong dapit.
Gisapupo sa pulis ang mga biktima ug gidala ngadto sa Cotabato Regional and Medical Center (CRMC) diin luwas na si Ronda samtang grabe ang iyang duha ka mga kauban.
Daghan ang nagtuo nga posibleng dunay kalabutan sa trabaho ni Ronda ang hinungdan sa pagpamanhig kanila. (Edgar E. Fuerzas)