NISAKA ngadto sa 30 porsiyento ang mga aksidente sa kadalanan dinhi sa Siyudad sa Davao karong tuiga itandi sa samang panahon niadtong miaging tuig.
Kini mismo ang gibutyag ni Davao City Police Office-Traffic Enforcement Unit (DCPO-TEU) Chief Major Dexter Domingo atol sa AFP-PNP press conference, Hulyo 12, 2023, sa Royal Mandaya Hotel.
Apan taliwala sa mga bag-ong aksidente sa "hit and run" nila Ana Mae Talili ug kanhi contestant sa prominent singing competition Mark Ken Suarez Mariscal, gikanayon ni Domingo nga ang mga behikular nga aksidente sa siyudad misaka kini og 30 porsiyento nga mas taas sa miaging tuig.
Samtang padayon pa ang pagsubay sa Buhangin Police station sa pagka-aksidente ni Mariscal base sa mando ni Davao City Police Chief Colonel Alberto Tupaz ug ni Regional Director Police Brigadier General Alden Delvo.
"Hindi tumitigil basta may nangyaring incidente lalong-lalo na may buhay na involved ang Davao City Police Office, hindi kami tumitigil," pasalig ni Domingo.
Gikan sa Enero hangtud Hunyo karong tuiga, duna nay kinatibuk-ang 2,942 gitahong insidente sa bangga sa kadalanan, 59 niini "hit and run" nga kapareho sa 0.2 porsiyento; apan giangkon sa DCPO-TEU nga dunay pag-ubos nga 12 porsiyento sa mga insidente tungod sa summer vacation sa mga estudyante apil na ang istriktong implementasyon sa Executive Order no. 39 series of 2013, ang mando nga nagtakda og speed limits alang sa tanang mga matang sa behikulo sulod sa territorial jurisdiction sa Davao City ug ang Republic Act No. 4136 nga labing nailhan isip Land Transportation and Traffic Code Act.
Sa mga sakyanan nga nalambigit sa bangga, 39 porsiyento niini mga pribado gisundan sa mga motorsiklo nga 18 porsiyento, unya mga trak nga 10 porsiyento nga kasagaran nahitabo taliwala sa alas 2 sa hapon hangtud 4 sa hapon ug 10 sa buntag hangtud 12 sa udto.
Gidasig ni Domingo kadtong nakasaksi sa "hit and run" nga insidente nga di mahadlok ug itaho gilayon kung unsa ang ilang nakita. Samtang sa mga nakaligis, hagit niya nga di biyaan ang ilang mga biktima tungod kay ang pagpabaya mahimong mapasakaan sila og reckless imprudence resulting in homicide.
