GIDUSO NA sa Sangguniang Bayan (SB) sa Pikit, Cotabato Province ang ordinansa nga magdili na sa mga tawo nga moangkas sa motorsiklo.
Kini maoy tubag aron maminusan ang sunod-sunod nga hitabo sa pagpamusil diin pulos "riding in tandem" ang mga suspek.
Nagbutang na sab og mga closed-circuit television (CCTV) camera ang lokal nga panggamhanan sa lungsod sa mga barangay nga sagad mahitabo ang pagpamusil nga gilangkuban sa Batulawan, Ladtingan, Ginatilan, Gli-gli ug Inug-ug.
Sa laing bahin, balik na sa normal ang klase sa mga tinun-an sa Pikit Central Elementary School human gikansela ang klase sa tanang lebel ning milabay'ng semana tungod sa sunod-sunod nga pagpamusil diin ang mga batang estudyante naapil isip mga biktima.
Apan matud pa ni Evelyn Kalantongan, principal sa PCES nga aduna gihapoy mga tinun-an nga wala makatungha tungod sa ilang kahadlok, hinuon gipasalig niini nga karong semanaha daghan na nga mga estudyante ang mobalik sa eskuwela.
Gitutukan na sa kapulisan, militar, barangay opisyal ug Barangay Peacekeeping Action Team (BPAT) ang pagbantay sa mga tulunghaan.
Gipasalamatan ni Kalantongan si Pikit Mayor Sumulong Sultan sa iyang pagpaningkamot nga makabalik dayon sa eskuwelahan ang mga tinun-an samtang gipahugtan na sa mga awtoridad ang seguridad sa Pikit.