Anti-bullying ordinance sa Davao City pasado na

(File Photo)
(File Photo)

DAKO ang kalipay sama sa ginikanan nga si Catherine Gempesaw, 37-anyos, taga Barangay San Antonio, Agdao District, Davao City human nga pasado na sa ikatulong pagbasa sa Konseho sa Davao City ang Anti-bullying Ordinance.

"Lipay kaayo kay sa panahon karon sa mga kabataan, isa ka bully lang na sa ilaha, magdamdam na sila, at least man lang duna na'y moprotektar kanila," ingon ni Gempesaw nga nahinabi sa SuperBalita Davao pinaagi sa Facebook Messenger Huwebes, Abril 13, 2023.

Niya pa ang pagpasa sa maong ordinansa usa ka dalan aron nga mas kampante ang mga ginikanan sa ilang mga anak diha sa mga tunghaan.

Nasayran nga sagad mahitabo ang pang-bully sa mga tunghaan, diin dalhon kini sa tinun-an sa ilang panimalay ug mamahimong masulob-on ug dili na unya ganahan mosud sa tunghaan.

Niadtong Huwebes, anaa sa dise siyete (17) ka mga konsehal ang mipabor sa pagpasa sa ordinansa, samtang dunay duha ang wala mipabor ug usa ang nag-abstain.

Sa nahitabo, dako ang pasalamat sa proponent sa Anti-bullying Ordinance nga si 3rd District Councilor Enzo Villafuerte, tsirman sa Committee on Civil, Political, and Human Rights sa 20th City Council, nga misuporta sa maong ordinansa ang majority sa iyang mga kaubanan sa Konseho.

Samtang sumala sa usa ka amahan nga si Reynaldo dela Fuente, 41-anyos, taga Barangay Tigatto, Buhangin District ning siyudad sa Davao nga bisan og wala ang maong ordinansa, usa ka dakong papel ang pagmaymay sa mga ginikanan sa ilang mga anak.

"Papel gyod namo, nato ning mga ginikanan nga sa tanan higayon, pasabton, maymayan sa mga posible nga impak kung ugaling mohimo sila og pagbiay-biay sa ilang isig ka estudyante, sa ilang mga friends, online," ingon ni Reynaldo sa SuperBalita Davao kagahapon.

Kahinumdoman nga niadtong Enero 31, 2023, ang maong ordinansa nakapasar sab sa ikaduhang pagbasa sa fourth regular session sa City Council.

Ang nasampit nga ordinansa nagtumong sa pagpalig-on sa daan nang national law nga mao ang Republic Act 10627, kun ang Anti-bullying Act, nga nag-protektar sa kabataan nga anaa nagtungha sa kindergarten, elementarya ug sa sekondarya ug sa uban pang mga learning centers nga ginatamay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph