NAGUOL ug nagpunay yawyaw ang 78-anyos nga lola human nawala ang isab-it nga arinola likid sa balay duol sa banyo ug nakit-ang buak na didto sa kasagbutan dili halayo sa ilang balay sa lungsod sa New Bataan.
Kini ang gibutyag sa 19-anyos nga si alyas An-an kinsa miasoy nga ang iyang lola nga gipatago sa pangalang Lola Siana perting sukoa ug buot ipa-baranggay ang grupo sa mga kabatan-onan nga nanaygon nga maoy gituohang nanghilabot sa maong arinola nga matud pa kapin 40 ka tuig nga giampingan.
Gisulti ni alyas An-an nga matag bulan sa Disyembre ginalimpyohan ug ginahugasan sa lola ang nahisgutang arinola ug niadtong higayona gibulad sa init sanglit bag-ong kining hinugasan.
Matud pa nga sa dihang hipuson ug ibalik na unta sa karaang cabinet nga maoy ginabutangan niini, nawala na kini og sa dihang gipangita didto kini napalgan sa kasagbutan ug nabuak na.
Labihan ang kaguol ug kasuko sa maong lola sanglit sumala pa adunay sentimental value kaniya ang arinola nga kaniadto maoy gigamit nga sudlanan sa kuwarta nga halin sa tindahan ug maoy nakapahuman pag-eskuwela sa lima niya ka mga anak sa namatay niyang bana.
Dugang gibutyag nga ang arinola regalo usab sa namatay nga bana ni Lola Siana atol sa ikanapulo nga tuig sa anibersaryo sa ilang kasal.
Desidido ang lola nga ipabarangay ang upat ka mga batan-on nga nanaygon nga gituohang maoy nanghilabot sa arinola apan gialam-alaman sa mga anak ug gisaaran nga ilisan sa samang arinola sanglit di sila seguro nga ang nahisgutang mga batan-on mao ba gayud ang nanghilabot niini.