SELOS karon ang gitan-aw nga usa sa mga motibo sa pagrapido sa upat ka mga tawo nga nagtagay og ilimnong makahubog alas 5 sa hapon niadtong Dominggo didto sa Morning Height, Purok 3A, Barangay San Isidro, Bunawan District, Davao City.
Sa spot report gikan sa Davao City Police Office (DCPO), nagselos ang bana hinungdan nga iyang gipamusil ang katagay sa iyang asawa nga misangko sa pagkamatay sa duruha, samtang ang lain pang duha talandugon ang kahimtang sud sa balay tambalanan.
Nasayran nga ang suspek nga si Luciano Ribalde Ek, alyad Victor, nagdala og pusil dayon iyang gipamusil ang upat nga nag-inom.
Ang asawa sa suspek nga si Melodina Lanada Ek ug ang katagay nga si Julito Cillotr Bacalso ang dead on arrival sa Tibungco Doctor's Hospital, samtang ang kaubanang duha nga sila Elvin Quilojano Bacalso ug Mary Jane Egsulan Ribalde anaa karon sa ospital.
Giingon nga nagselos ang bana gumikan suma pa sa gitago nga relasyon nilang Julito ug sa asawa sa suspek.
Upat ka mga basiyo sa bala sa kalibre .45 nga pistola ang narekober sa nahitaboan, samtang human sa krimen, daling misibat ang suspek kinsa gipailawom karon sa manhunt operation sa Bunawan Police Station.