KIDAPAWAN CITY -- Gikompirma ni Department of Agriculture-Soccsksargen Regional Director Arlan Mangelen nga dunay nagpositibo nga kaso na sa African Swine Fever (ASF) sa Arakan sa North Cotabato.
Nasayran nga duna nay giigo sa ASF nga mga binuhing baboy sa usa ka sitio sa Barangay Lanao Kuran sa maong lungsod.
Matud ni Mangelen nga 30 ka blood samples na ang ilang gikuha gikan sa nahisgutang sitio kung diin usa niini nagpositibo sa kagaw.
Kahinumdoman nga siyam na ka barangay sa Magpet ang grabeng giigo ang kababoyan sa kagaw ug apektado na ang negusyo nga karne.
Mitaas sab ang ihap sa mga binuhing baboy sa Magpet nga na-depopulate sa 500-meter radius gikan sa ground zero gumikan sa ASF.
Una nang gikompirma ni Mangelen nga gikan sa "lamaw" nga gilawog sa mga baboy sa Magpet ang ASF sa soriso nga napalit sa online nga kontaminado sa virus.
Nakahatag na og pasiuna nga hinabang ang lokal nga panggamhanan sa Magpet sa mga hog raisers samtang ang DA-Soccsksargen gikatakda sab nga mohatag og cash assistance.