DAGHAN na nga mga binuhing baboy sa Siyudad sa Kidapawan sa North Cotabato ang nagpositibo sa African Swine Fever (ASF).
Kini mismo ang gikompirma ni Kidapawan City Veterinary Officer Dr. Eugene Gornez.
Matud ni Gornez nga bag-ohay lamang, lima ka binuhing baboy sa Sitio Mahayahay, Barangay Paco ang nataptan sa ASF.
Samtang miabot na sa 95 ka mga baboy ang gipangpatay ug gilubong sa ground zero.
Mikuha na og blood sample sa mga baboy ang City Veterinary sa mga barangay sa Binoligan, New Bohol ug Balindog sa siyudad aron masusi.
Kahinumdoman nga unang giigo sa ASF ang Magpet nga gisundan sa Arakan, Antipas, President Roxas ug ubang dapit sa probinsiya.
Sa kasamtangan, gipahugtan pa ang pagbantay sa mga dapit nga giigo sa ASF aron makunhuran ang ihap sa mga binuhing baboy nga mataptan sa kagaw. (Edgar E. Fuerzas)