DALA sa localized thunderstorms ang kusog nga hangin nga miigo sa sentrong bahin sa Davao City niadtong Sabado sa hapon, Oktubre 7, 2023, nga miguba sa pipila ka mga kabalayan ug mga tulda sa paninda sa Roxas Night Market.
Sumala sa Philippine Atmospheric, Geophysical and Astronomical Services Administration (Pagasa) hatud ang maong kusog nga hangin gumikan sa localized thunderstorms o ang pagdalugdog ug pagpangilat nga nagpasulabi sa dakong bahin sa Davao Region.
Sa Bankerohan, Davao City, nahapla ang atop sa bunkhouse, samtang sa Barangay Agdao Proper, naguba sab ang usa ka guard house nga gama sa kahoy ug metal samtang sa Roxas Night Market nanglupad ang mga tent o tulda sa mga vendors apil na ang ilang mga lamesa, mga baligya ug uban pa.
Hinuon, walay natalang nasamdan o namatay atol sa hitabo diin subay sa advisory nga gipagawas sa Davao City Disaster Risk Reduction and Management Office (DCDRRMO), ang kusog nga hangin sa maong adlaw, dili lang nakaapekto sa pipila ka mga lugar sa Davao City apan lakip na sa Davao del Norte.
Kagahapon, ug hangtud na karong adlawa, Oktubre 10, ang dakbayan sa Davao ug ubang dapit sa Davao Region makasinati sa madag-umon nga kalangitan inubanan sa katag-katag ug mga pat-ak pat-ak nga mga pag-ulan, kilat ug pagpanalugdog tungod sa Trough of a Low Pressure Area (LPA) o Localized Thunderstorms.
Posible ang pagbaha ug pagdahili sa yuta sa panahon nga adunay kasarangan ngadto sa kusog nga mga pag-ulan. Hinay ngadto sa kasarangan nga huyop sa hangin nga magagikan sa Amihanang Sidlakan ngadto sa Amihanang Kasadpan nga direksiyon ang mopasulabi, ug ang kadagatan mahimong hapsay ngadto sa kasarangan ang mga pagbalud.