NAGPASIDAAN ang lokal nga panggamhanan sa Makilala, probinsiya sa Cotabato ngadto sa katawhan nga likayan ang pag-ihaw ug pagkaon og American bullfrog kay makahilo kini ug daghan nang nangamatay.
Ang pahimangno nigawas human nga namatay ang usa ka 41-anyos nga babaye sa dihang nikaon og inihaw ug giluto nga American bullfrog Huwebes sa hapon, Septyembre 28, 2023, sa Makilala, Cotabato Province.
Ang namatay giila nga si Marilyn "Letlet" Emba Vehemente nga nagpuyo sa Barangay Malasila sa nahisgutang lungsod sa probinsiya.
Sumala ni Janice Ipsagel nga nikaon si Vehemente sa giihaw ug giluto nga American bullfrog sa ilang silingan.
Apan pipila pa gani ka gutlo ang milabay, kalit lang nga nagsuka-duka si Vehemente ug migahi ang nawong ug nagping-it sa kasakit sa iyang tiyan.
Nawad-an siya og panimuot, hinungdan nga gitabang sa iyang pamilya ug gidala ngadto sa Makilala Specialist Hospital apan namatay gihapon siya.
Gikanayon sa doktor nga adunay likido nga parte sa lawas sa baki nga posibleng dunay hilo nga maoy hinungdan sa kamatayon sa biktima.
Sumala sa mga eksperto nang mangihaway og American bullfrog nga dunay ugat sa baki nga makahilo ug kinahanglan nga kuhaon ug ilabay aron dili masagol sa pagluto.