MAKILALA, North Cotabato -- Nagpahigayon og "Change of Command Ceremony" ang 39th Infantry Battalion (IB) sa Philippine Army sud sa ilang kampo sa Barangay Poblacion, alas 10:30 sa buntag kagahapon, Huwebes, Enero 30.
Gihulipan sa puwesto si outgoing commander Lieutenant Colonel Rhojun Rosales human sa duha ka tuig nga pagpamuno sa batalyon.
Milingkod nga bag-ong pamuno sa 39th IB si Lieutenant Colonel Geoffrey Carandang.
Mismong si Major General Reuben S. Basiao, bag-ong commander sa 10th ID, maoy mi-instalar kang Carandang.
Si Carandang unang mikuha og kursong Bachelor of Science in Nursing didto sa Cebu State College apan kutob lang sa second year ug 1993 dihang misud sa Armed Forces of the Philippines ug mi-graduwar sa Philippine Military Academy (PMA) niadtong 1997.
Nadestino sab kini sa 10th Infantry Division sa Panacan, Davao City.
Atol sa programa, gipresenta ni Rosales ang mga kalampusang nahimo sa 39th IB, apil na ang pag-neutralize sa dagkong lider sa rebeldeng New People's Army, pagtahan sa ubang komunista ug mga pagpangibot og mga marijuana sa plantasyon sa Kiblawan, Davao del Sur.
Sa pagdawat ni Carandang sa bag-ong tahas, gipasalig niini nga ipadayon ang mga programa ug kalamaboang nahimo sa "Smash 'Em Battalion" ilabi na ang paggukod sa mga teroristang grupo ug ang paghatag og proteksiyon ug mga programa alang sa komunidad.
Samtang si Basiao sa iyang pagpamulong nagbutyag nga angayang mohimo sila og conflict resilience communities para bungkagon ang mga guerilla fronts ug sumpuon kini.
Gipangayo sab niini ang suporta sa komunidad. (Orlando B. Dinoy)